Priso ang isa ka high ranking official sang North Negros Front – Communist Party of the Philippines New People’s Army matapos madakpan sa border monitoring control point sa ciudad sang Cadiz, Hunyo 9 sang gab-i.
Sa interview sang Bombo Radyo kay Police Major Robert Mansueto, hepe sang Cadiz City Police Station, ginpahayag sini nga nagapatigayon sila sang border monitoring control sa ciudad bilang kabahin sang precautionary measures batok sa COVID-19 sang naglabay ang isa ka public untility vehicle (PUV) nagikan sa Bacolod.
Bangud kinahanglan itsekyar ang tagsa-tagsa ka mga persona, ginpapanaog sini ang mga pasahero apang ang suspetsado nga si Gaspar Davao, 55 anyos ang wala nagkooperar.
Suno kay Mansueto, wala man ini nagasuksok sang facemask gani ila ginlaygayan apang nagasabat pa ini sang indi manami sa mga otoridad kag indi gid luyag maggwa sa salakyan.
Suno sa iya, nakita sang mga otoridad nga may ginkuot sa iya nga bag si Davao kag sang makit-an nga isa ini ka fragmentation grenade, ginhingagaw nila ini agaw sa suspetsado.
Nakuha man sa iya paghinakop ang mga dokyumento nga nagaunod sang pagtulun-an sang mga katapo sang NPA, P14,000 nga cash, walo ka nagkalain-lain nga unit sang cellphone kag mga newsletters.
Sa karun, yara sa kustodiya sang Cadiz City Police Station si Davao kag nakatalana nga pasakaan sang kaso nga rebellion kag pagbayolar sa R.A. 10591.
Ginpahayag naman ni Col. Inocencio Pasaporte, commander sang 303rd Infantry Brigade, nga isa ka finance officer kag secretary sang NNF si Davao.
Nagapati man ini nga kalabanan sa mga miyembro sang grupo nga National Federation of Sugar Workers (NFSW) ang mga rebelde kag nagapanago lang sa asosasyon.
Wala pa man nahibaluan kun ano ang ginkadtuan ni Davao sa Bacolod kag kun diin nagikan kag para sa ano ang P14,000 nga nakuha diri.
