Ginatutukan, ginasundan kag ginabantayan sa karun sang Bacolod City Police Office ang dako nga mga identity sang drug users kag drug pushers sa ciudad sang Bacolod.
Sa interview sang Bombo Radyo kay Police Lt. Col. Ronnie Brillo, commander sang Bacolod City Mobile Force Company, kasunod sa mandu ni BCPO director Police Col. Noel Aliño nga mas focusan ang high value individual kumpara sa mga street level individual, naaresto kahapon sang kaagahon si Marlon Pango sa Purok Pilipinhon, Barangay 30, Bacolod City nga miyembro sang Caunda Drug Group.
Sa buy bust operation nga ginpatigayon sang Bacolod City Police Office-City Drug Enforcement Unit kaupod ang City Intelligence Unit, nakumpisakr kay Pango ang 16 ka sachet sang suspected shabu nga nagabug-at sang 604 grams kag ginabanta nga may balor nga P4,352,000.
Suno kay Brillo, yara sa master list sang mga miyembro sang Caunda Drug Group ang pangalan ni Pango kun sa diin ang grupo ang may yara sang lider nga tigulang nga babayi kag may yara sang mga subgroup leader kag subgroup member nga yara sa idalum sang kontrol sini.
Si Pango, ang makaagi na preso kun sa diin suno kay Brillo mas nagbakod kag naglapad pa gid ang koneksyon sini sa illegal nga druga sang yara sa sulod sang jail facilities, amo nga liwat ini nga nagsulod sa illegal sang ini nakagwa na.
Pahayag ni Brillo, may yara na sang naidentify nga mga miyembro sang Caunda group nga ginasundan kag ginabantayan ang CDEU kag intelligence unit.
Samtang, nagpasalig naman ini nga bisan manubo ang output sang ciudad sa mga drug clearing operation sa kabug-usan nga Western Visayas, matuod-tuod kag piho naman ang ila trabaho.
Nagpangagda si Brillo sa tanan nga luyag makigbahin sa Community Based Drug Rehabilitation Program nga indi magkahadlok bangod ang gobyerno yara nga nagabulig para sa ikaayo sang ila pangabuhi.
