Wala naka-upang ang coronavirus pandemic sa paghatag sang kasanag sa Disyembre sang mga Himamaylanon matapos ginpalibutan sang nagkalain-lain nga disenyo kag duag sang mga suga ang Himamaylan City Hall kagab-i kadungan sang ginpatigayon nga lights on ceremony.
Sa interview sang Bombo Radyo kay Himamaylan City Mayor Raymund Tongson, ginpahayag sini nga una pa lang ini nga phase sang ila nga lights on ceremony bangud sa masunod nga mga sinemana, sa Old Bridge kag Public Plaza naman sila magapatigayon sang opening of lights.
Aminado si Tongson nga nakibot ini sa suporta nga ginpakita sang mga pumuluyo bangud sang Biyernes lang sila nag-anunsyar sa social media nga magapatigayon sang Christmas Light Show kag kuntani virtual lang ini apang kagab-i, nakit-an sini ang suporta kag enthusiasm sang mga residente.
Nagpangayo pa ini sang pasaylo sa programa kagab-i nga indi sila makapalawig bangud sa COVID protocols apang naapresyar sini ang pag-ugyon kag pagpalangga nga ginpakita sang mga Himamaylanon.
Pagatun-an naman sang local government ang ila sarang nga mahimo sa nabilin nga duha ka phase sang opening of lights agud ma-implementar ang health protocols matapos sini makit-an ang response sang mga tawo kagab-i.
Suno sa alkalde, ang pagpasiga sang City Hall ang ila ginpreparahan sang duha tubtob tatlo ka semana kag nangin sulit ini bangud iya nakit-an ang positibo nga reaksyon sang mga pumuluyo.
Nagapasalamat man ini sa tiyansa kag suporta nga ginhatag sa iya sang mga residente apisar nga madugay ini nga nadula sa politika.
Nagpang-abiso man si Tongson sa mga Himamaylanon nga kadungan sang pagselebrar sang Paskwa, hatagan sang prayoridad ang pamilya, Ginoo kag ikaayong lawas.
Gin-engganyo man sini ang mga pumuluyo nga mangin mapinasalamaton sa kun ano ang may yara, magpadayon kag magtinguha para sa pamilya kag ciudad.
