Nagpagwa man sang resoluson ang Sangguniang Panlungsod sang Himamaylan City nga nagasuporta sa panawagan sang mga kongresista sa Negros Island Region nga ma-imbestigaran ang rasun sa tuman nga pagnubo sa millgate price sang kalamay.
Sa interview sang Bombo Radyo Bacolod kay Himamaylan City Vice Mayor Justine Gatuslao, nagpasar sila kahapon sang reslusyon nga nagapanawagan sa National Government nga magpatuman sang interventions.
Panawagan man nila sa mga concerned government agencies kaangay sang Sugar Regulatory Administration, Department of Agriculture, Department of Justice kag National Economic and Development Authority nga usisaon ang mga rasun kun ngaa nagpanaog sa P2,200 tubtob P2,300 ang millgate price sa 50 kilos ukon kada sako sang kalamay.
Nahibaluan nga una na nga nagpagwa sang joint resolution ang mga kongresista sa Negros Island Region tuhoy sa imbestigasyon sa isyu, nga ginsundan pa sang panawagan ni Negros Occidental 3rd District Congressman Javie Benitez para sa House Inquiry.
Suno kay Gatuslao, ini ang ila nga ginsuportahan ilabi na nga yara sa Himamaylan City ang may pinakamadamo nga Agrarian Reform Beneficiaries sa Negros Island.
Dugang pa sini nga wala na sang dalagkuan nga hacienda sa ila ciudad kag mayorya sa mga manguguma ang small and medium sugar planters.
Panindugan ni Gatuslao nga 60 tubtob 70 porsyento sang ekonomiya sa Negros Island ang nagasalig sa tubo.
Suportado man nila ang suhestyon ni Negros Occidental 5th District Representative Dino Yulo nga dapat transparent ang patigayunon nga imbestigasyon.
