BACOLOD CITY — Suportado ni Governor Alfredo Marañon Jr. ang nagkalabilin nga mga proyekto para sa ginbungkag nga Negros Island Region (NIR).
Nahibaluan nga sa Oktubre 9, dalayon na nga mabungkag ang NIR apang may mga draft development programs pa nga gintalana para sa NIR kag suno sa National Economic and Development Authority (NEDA), madayon ang mga ini bisan pa nga matunaw na ang ika-18 nga rehiyon.
Suno kay Governor Marañon, nalakip sini nga mga proyekto ang para sa imprastraktura, lakip na ang pagpatukod sang mga taytay kag pagpaobra sang mga dalan, partikular na ang magaangot sang ciudad sang Himamaylan, diri sa Negros Occidental sa banwa sang Tayasan, sa Negros Oriental.
Ang Himamaylan-Tayasan road ang mangin pinakamalip-ot nga ruta nga nagakonekta sa magkaiping nga probinsiya.
Nagalaum man ang gobernador nga mapasanyog ang turismo sa isla sang Negros sa idalom sang sini nga mga proyekto.
Suno kay Governor Marañon kun indi malakip sa Build Build Build program sang Duterte administration, mahimo man nga kuhaon ang pundo sa nasambit nga mga proyekto sa annual budget sang national government.
