Gin-ako sang pamilya sang mga napatay nga New People’s Army sa engkwentro sa Cauayan, Negros Occidental nga nakahibalo sila nga miyembro sang rebelde nga grupo ang ila himata.
Sa interview sang Bombo Radyo kay Vilma Cortez, magulang ni Rolando Dantes Jr, indi sini mapunggan ang pagtulo sang iya luha bangod napatay ang iya manghod.
Suno diri, kapin 20 ka tuig na nga yara sa hublag si Rolando kag ginabanta nga lima ka tuig na sila nga wala nagkitaay.
Suno pa diri, ginhambalan pa siya ni Rolando nga paeskwelahon lang nila ang iya hinablos nga luyag mangin pulis para sa iya maayo nga bwas damlag bangod wala gid siya sang mahatag nga bulig sa iya pamilya.
Pahayag sini, sang bata pa sila, nakita ni Rolando nga ginkastigo ang iya amay sang army kun sa diin nakita sini ang pagtapak sang militar sa ila amay tubtob nga nagakamang na ini.
Humalin sadto, desidido na ini nga magsulod sa hublag kag sa edad nga 18 nag-upod na ini sa rebelde nga grupo.
Suno kay Cortez, ginpasibangdan lamang sadto ang ila amay nga NPA bangod nagapuyo sila sa bukid.
Ginhambalan man sini si Rolando nga magpauli na apang nagsabat ini nga namatsahan na ang iya kaugalingon.
Pahayag ni Cortez, maboot ang iya utod kag nabaton na sini ang natabo. Samtang, luyag pa kuntani sang asawa ni Gilbert Tingson nga isa sa napatay nga New Peoples Army nga makita man sang ila kabataan ang ila amay apang wala man ini nagapauli humalin sang nagsulod sa hublag.
Sa interview kay Analie Tingson, anum ka tuig ang naglabay humalin sang nag-upod sa rebelde nga grupo ang iya bana.
Suno diri, nagpadulong ang armado nga grupo sa ila balay kag ginkumbinse si Gilbert nga mag-upod sa hublag para magbulig sa mga pumuluyo kag naghambal man ang iya bana nga ma-upod ini.
Suno kay Analie, sang Disyembre 2024 nagpauli si Gilbert sa ila balay apang tatlo lang ini ka adlaw nga nagtinir sa ila kag nakabatyag si Analie sang kakulba sa posibilidad nga may matabo kag mabutang sa risgo ang ila pamilya.
Si Analie kag Gilbert may anum ka mga kabataan kag may yara na sang nagatrabaho kag naga-eskwela sa kolehiyo apang wala naman nagahatag sang bulig ang iya bana.
Ginhambalan man sini si Gilbert nga indi mag-upod sa NPA apang wala sini nakumbinse ang iya bana.
Pahayag ni Analie luyag niya nga mahakos ang iya bana kag ginalauman sini nga makita niya man ang ila kabataan apang wala man ini nagapauli sa ila balay.
Sang nahibaluan sang ila kabataan nga napatay ang ila amay, naghilibion ang mga ini bangod nakahibalo sila nga bisan papaano palangga sila sang ila amay.
