Patay ang tatlo ka miyembro sang isa ka pamilya matapos gin-alegar ginmassacre sa Sitio Guinam-an, Barangay Buenavista, Murcia, Negros Occidental kagab-i.
Ang mga biktima ang ginlakipan sang amay nga si Neldy Celayes, 59 anyos, iloy nga si Josephine Celayes, 60 anyos kag ang ila bata nga si Jovie Celayes, 33 anyos.
Sa interview sang Bombo Radyo Bacolod kay Junel Ceyales, 37 anyos subang nga bata, residente sa Barangay Minoyan, Murcia, siya ang gintawagan lamang agud pahibaluon sa natabo sa iya ginikanan kag utod.
Sa impormasyon sini nga nadawat, nabatian ang lupok alas-7:00 kagab-i, apang ginpinsar sang mga pumuluyo sa palibot nga palupok.
Malayo naman ang distansya sang mga pamalay gani wala sang nakakita sang mahimo suspect.
Suno kay Junel, ang manghod sini ang nasapwan malapit sa bubon, ang amay ang yara sa likod nga piyertahan sang balay kag ang iloy ang may pila ka metros nga distansya.
Sa inisyal sini nga nakita, lunsay may mga igo sang bala sa ulo ang iya mga himata.
Suno diri, mabutuon katama ang iya mga ginikanan kag wala man ini sang nakaaway sa lugar.
Ila man propedad ang duta gani ginalantaw sini nga malayo nga duta ang rasun sa pagpatay.
Indi man pagpangawat ang rasun, bangod wala man sang may nadula sa balay kag yara lang ang cellphone sa lamesa kag platera, kag yara lamang ang mga manok kag karbaw sa palibot.
Si Jovie ang nagapuyo naman sa lain nga balay separar sa ila ginikanan, kag natabuan nga nagbakasyon ang asawa sini kag kabataan sa banwa sang Manapla.
Suno kay Junel, sa masami ginadul-ong man nila ang ila bata sa iya ginikanan agud malingaw man ang mga ini sa apo, kag ginapakamaayo na lamang sini nga wala pa niya nadul-ong ang iya bata.
Panawagan sini ang hustisya para sa iya ginikanan kag manghod.
