80,000 ka mga pumuluyo kag 4,136 ka mga panimalay ang makabenepisyo sa ipatukod nga Himoga-an Bridge nga nahamtang sa Brgy. Bato – Baviera sa ciudad sang Sagay.
Kahapon, ginpatigayon ang groundbreaking sang nasambit nga taytay kag ini ang gintambungan nanday Governor Eugenio Jose Lacson, 2nd District Congressman Leo Rafael Cueva, Sagay City Mayor Alfredo Marañon, Sagay City Vice Mayor Narciso Javelosa Jr., kag Engr. Remelyn Recoter upod ang DA RF06, Philippine Rural Development Project kag Provincial Project Management and Implementing Unit Personnel.
Sa impormasyon nga nakuha sang Bombo Radyo, P76 million ang balor sang nasambit nga taytay nga ginalauman nga masuguran na sa masunod nga bulan.
376 ka adlaw ang days of completion sini kag ginabanta matapos sa Setyember 16, 2021.
Tinutuyo sini ang mapadasig ang pagdala sang agricultural products nagikan sa bukid padulong sa mga banwa kag ciudad subong man ang pagpataas sang productivity kag profitability sang mga mangunguma.
Nahibaluan nga ang Negros Occidental ang may pinakadako nga budget para sa infrastructure projects sa bilog nga Visayas Region.
May yara sang P733 million nga budget ang probinsya kag may nakastandby pa nga P533 million gani sa kabug-usan, may yara sang P1.2 billion nga pondo ang Negros Occidental para sa pagpatukod sang mga imprastraktura.
