Pilason ang isa ka hinablos matapos ginwasay sang iya tiyo bangod sa gina-alegar ini ang nadakpan nga nagasampaw sa live-in partner sang suspect alas-8:00 kahapon sang aga sa Hacienda Palencia, Brgy. La Granja, La Carlota City.
Ang biktima ang ginkilala nga si Anthony Martenesio, 27 anyos, migrant worker kag residente sa Bugasong, Antique; samtang ang suspect amo si Jimmy Martenesio, 36 anyos, migrant worker kag residente man sa kaangay nga lugar sa Antique.
Gilayon naman nagresponder ang La Carlota City Police Station matapos mabatun ang report.
Sa imbestigasyon, nahibaluan nga ginwasay sang tiyo ang iya hinablos nga naigo sa ulo kag pila ka bahin sang lawas.
Gilayon naman nga gindala sa ospital ang biktima, para sa nagakaigo nga medical attention.
Narecover man sang kapulisan ang wasay nga gingamit sa krimen.
Gilayon man nga nadakpan si Jimmy kag sa karun yara na sa kustodiya sang La Carlota City Police Station.
