Luyag ni Negros Occidental Governor Eugenio Jose “Bong” Lacson nga mabatian ang sabat sang contractor sang Provincial Administration Center matapos wala ginpadayon ang pag-ubra sang building.
Suno sa Gobernador, malapit nalang matapos ang proyekto kag anugon nga wala ini ginpadayon.
Pahayag sini nga sang tinalikdan nga tuig, nadelay ang pag-construct sang building bangud luyag sang probinsya nga magsaylo sang lokasyon.
Apang sa subong, paathag ni Lacson nga wala ini napadayon bangud sa financial issue sang Dynamic Builders and Construction Company nga amo ang contractor sang PAC Building.
Sa kaangot nga balita, sa press statement nga ginpaggwa sang Dynamic Builders and Construction Company, ginpasalig sini nga padayunon ang construction sa Provincial Administration Center.
Suno diri, nakasiguro na ang kumpanya nga may bastante nga pondo agud mapadayon ang implementasyon sa mga ubrahunon kag pagkompleto sang proyekto sa sulod sini nga tuig.
