Patay ang isa ka babaye matapos nga ginluthang sa Purok Arao, Barangay Vista Alegre, ciudad sang Bacolod, sang Lunes sang gab-i, Enero 13.
Ginkilala ang biktima kay alyas Jenelyn, 52, samtang ang suspek amo si alyas Johny, lunsay residente sang amo nga lugar.
Sa interview sang Bombo Radyo Bacolod kay Police Captain Dax Santillan, station commander sang Bacolod Police Station 7, nagresponde sila bangud nakabaton sila sang report nga may isa ka babayi nga ginpahayag gintiro sa Barangay Vista Alegre.
Suno kay Santillan, insigida man nga nagresponde ang mga kapulisan apang wala na nila maabtan ang biktima kag ang suspek.
Santo sa imbestigasyon sang Police Station 7, naga-istoryahanay sanday Jenelyn kag ang kaingod sini sang nag-abot ang suspek apang nagpauli ini sa ila nga balay.
Makaligad ang pila ka minutos, nagbalik si alyas Johny nga may dala nga sulpak kag gintiro ang biktima sa likod.
Gindala pa sa ospital ang babayi apang ginbawi-an ini sang kabuhi.
Suno kay Santillan, ginapasibangdan sang suspek ang biktima nga amo ang kabangdanan sang indi nila nga pag-intsindihanay sang live-in partner sini nga nagatrabaho sa luwas sang pungsod.
Nagapabilin nga at large ang suspek kag gintinguhaan man sang mga kapulisan nga ini ang pasungkaon apang ginalantaw nga bug-os na ang pinsar sini nga pangatubangon ang criminal case nga ipasaka batok sa iya.
