Gin-aprubahan na sang regional inter-agency task force (RIATF) ang hingyo sang ciudad sang Cadiz, Manapla kag Binalbagan nga moratorium sa mga locally stranded individuals.
Sang Lunes, Nobyembre 2, nagsugod na ang pagdumili sa mga LSI sa ciudad sa Cadiz tubtob Nobyembre 6.
Nagsugod man sang Lunes ang moratorium sa mga LSI sa Binalbagan apang epektibo ini tubtob Nobyembre 16.
Sa Nobyembre 5 naman magasugod ang moratorium sang banwa sang Manapla kag magatapos sa Nobyembre 18.
Sa interview sang Bombo Radyo kay Cadiz City Mayor Salvador Escalante, ginpahayag sini nga sang Oktubre 20 pa sang sila ang nagpadala sang request sang RIATF bangud sadto, puno ang healing center sang ciudad.
Sa karun, suno sa iya, yara sa 60 tubtob 70% ang occupancy sang ila isolation facility.
Suno sa alkalde, pagkatapos sang moratorium, sa Nobyembre 7, sarang na nga makabaton sang mga LSI ang ciudad.
Suno diri, kahapon, may duha ka mga positibo nga kaso ang nagdugang sa Cadiz City samtang 15 naman ka mga pasyente ang nakatapos na sang ila quarantine period kag negatibo na sa COVID-19.
