Luyag sang acting general manager sang Central Negros Electric Cooperative nga ipadangat sa National Electrification Administration ang hingyo sang anom ka alkalde nga isuspende ang plebisito para sa Joint Venture Agreement sa tunga sang CENECO kag PrimeElectric.
Sa interview sang Bombo Radyo kay Atty. Arnel Lapore, madamo sang problema nga naengkwentro sa ginpatigayon nga plebisito sang Hunyo 24 kag 25 kag pila diri amo nga may nalakip sa masterlist nga mga ngalan sang mga nagtaliwan na kasubong man ang wala ngalan sa lista.
Ini bangod nga wala naga-update ang mga member consumers sang ila registration ukon membership gani wala sang ideya ang CENECO kun nagtaliwan na bala ang konsumidor gani mas maayo nga ipadangat sa ila opisina ang ini nga impormasyon agud ma-update ang ila membership.
Pahayag ni Lapore, dapat nga mahatagan sang katawhayan kag oras ang plebisito ilabi na nga importante diri ang desisyon sang mga member consumers.
Luyag sini nga ipadangat sa NEA ang hingyo sang anom ka alkalde nga isuspend ang plebisito sa sulod sang isa ka bulan.
Sa karun may pangduha-duha man ini kun matigayon ang plebisito sa Hulyo 8 kag 9 apang padayon sa gihapon ang ila educational campaign kag information dessimination nahanungod sa plebisito sang Joint Venture Agreement.
