Ginatun-an pa sang Department of Trade and Industry ang hingyo sang mga manufacturer nga pasakaan ang presyo sang ila nga produkto bangud sa nagamahal man nga gasto sa produksyon.
Suno sa Philippine Baking Industry Group, pasakaan nila sang P4 ang 450 grams nga Pinoy Tasty samtang ang 10 kabilog nga Pinoy Pandesal naman ang pasakaan man sang P4.
Ini ang bangud sa padayon nga pagsaka sang presyo sang harina nga ginagamit sa paghimo sang tinapay.
May yara man sang pending request nga pasakaan ang presyo sang noodles.
Ang iban pa nga basic goods kaangay sang tinapay, detergent kag canned meat ang naghingyo man nga mapasaka sang presyo bangud sa nagasaka nga gasto sa inputs.
Sa interview sang Bombo Radyo kay DTI Negros Occidental Provincial Director Rachel Nufable, indi available sa Negros Occidental ang Pinoy pandesal gani indi ini makita sa market.
Bangud wala nagapanaog ang presyo sang produktong petrolyo kag nagamahal man ang production cost, naghingyo ang mga manufacturers nga pasakaan ang presyo sang ila produkto.
Base sa monitoring sang DTI, wala nagsaka ang presyo sang tinapay halin Mayo 30 tubtub Hunyo 3, amo man sa presyo sang detergent bars kag sardinas.
Sa karon, ginatun-an sang DTI Central Office ang hingyo sang mga manufacturers bangud indi man mapasakaan insigida ang suggested retail prices.
