Padayon nga nagapaayo ang isa ka lalaki matapos mabun-an malapit sa isa ka mall sa Barangay 12, Bacolod City.
Sa interview sang Bombo Radyo Bacolod kay alyas Rose, pasado alas-4:00 kahapon sang hapon natabo ang pagpamuno.
Suno kay alyas Rose apisar nga nabun-an na ang biktima ginlagas pa ini sang suspek kag naglibot sa mga balaligyaan sagwa sang mall tubtob nga natumba na ini.
Madasig naman nga nakaresponde ang mga kapulisan gani gilayon nga nadakpan ang suspetsado.
Ginpahayag sang station commander sang Bacolod Police Station 1 nga may yara sang daan nga hiligut-anon ang biktima kag suspek.
Ang biktima ang ginkilala kay Alias RG, 35 anyos, lalaki, single, kag residente sang Barangay 14, Bacolod City.
Ginkilala man ang suspek kay alias FERN, 35 anyos, lalaki, single kag residente sang Barangay Tangub.
Sa interview sang Bombo Radyo Bacolod kay Police Captain Francis Depasucat, station commander sang Bacolod Police Station 1, nagapadayon ang imbestigasyon sa nagluntad nga stabbing incident.
Suno sa station commander nga ginalantaw pa nila kun ano gid ang ginhalinan sang insidente.
Ang biktima ang nakaangkon sang samad sa nagkalain-lain nga bahin sang lawas kag padayon nga ginabulong sa ospital.
Samtang ang suspek ang gilayon man nga nadakpan sa bulig sang mga pumuluyo kag personnel sang Criminal Investigation and Detection Group (CIDG).
Nakuha sa paghinakop sini ang isa ka kutsilyo nga may dugo pa.
Sa karun nakadetain sa police station 1 ang suspek kag natalana nga pasakaan sang kaso.
