Nagapanawagan ang hepe sang Hinigaran Municipal Police Station sa tag-iya sang salakyan nga may mga dugo nga gin-abandonar sa Sitio So-ol, Brgy. Gargato, Hinigaran nga makig-angot sa kapulisan.
Sa interview sang Bombo Radyo Bacolod kay Police Lt. Col Jovil Sedel, hepe sang Hinigaran Municipal Police Station, alas 3:58 kahapon sang hapon may yara sang concerned citizen nga nagpahibalo nga may yara sang gin-abandonar nga salakyan sa nasambit nga lugar.
Suno kay Sedel, ang salakyan ang isa ka Hyundai Accent, nagaduag grey kag may plate number nga FAD8113.
Ini ang ginbilin sa katubuhan nga kapin apat tubtob lima ka kilometros ang kalayuon nagikan sa plaza sang banwa.
Ginrespondehan man gilayon sang mga kapulisan ang lugar.
Ginpakadtuan naman sang operatiba sang Scene of the Crime Operation (SOCO) agud nga maproseso ang ginbayaan nga salakyan nga ginapahayag may yara sang dugo sa sulod sini.
Nagapadayon sa karun ang imbestigasyon sang Hinigaran Municipal Police Station kag magacoordinate man sila sa Land Transportation Office.
