Gin-ako sang alkalde sang banwa sang Hinigaran nga sa Barangay Anahaw naghalin ang pito ka mga baboy nga ginbakal sang Victorias Milling Compay nga nagpositibo sa African Swine Fever matapos nga ginpaidalom sa random testing.
Sa interview sang Bombo Radyo Bacolod kay Mayor Jose Nadie Arceo, problema sini sa karun nga madamo sang mga residente sa banwa sang Hinigaran ang nagatago sang mga nagakatabo sa ila ginasagod nga mga baboy kaangay lamang sang mga nagamasakit kag nagakapatay.
Suno kay Arceo, natigayon nga mabakal sang VMC ang mga baboy gikan sa mga backyard hog raisers sa Barangay Anahaw bangud gin-issuehan man ini sang certification sang Barangay.
Sang June 1 ginbakal sang nasambit nga kumpaniya ang mga baboy kag sang June 5 ginkumpirmar sang Department of Agriculture Regional Office 6 nga positibo ini sa ASF.
Suno diri, wala man sang reported sa Municipal Agriculture Office sang Hinigaran nga may yara sang nagamasakit nga mga baboy ukon may napatay.
Sa karun, nagpatigayon na banwa sang Hinigaran sang testing sa mga baboy sa banwa kag ang mga napatay nga mga baboy ang gilayon man nga ginalubong.
May yara naman sang ginbutang ang banwa nga border control agud nga masiguro nga wala na sang makagwa nga baboy nagikan sa nasambit nga banwa.
Wala naman sang dapat nga magbaligya sang buhi nga baboy sa higad sang dalan.
Nagpanawagan si Arceo nga dapat ipaihaw ang baboy sa slaughterhouse agud nga mainspection ini kag malikawan ang pagbaligya sang baboy nga infected sang nasambit nga balatian.
