May duha na ka person of interest na ang Hinoba-an Municipal Police Station sa nagpatay sa 24 anyos nga babayi nga nasapwan nga nagakaagnas na nga bangkay sa Purok 2, Barangay 1, Poblacion, Hinoba-an, Negros Occidental sang Abril 30.
Ginkilala ang biktima kay Talia Evangelista, 24 anyos, single, nagatrabaho nga kabulig sa balay kag residente sang Pulang Araw, Brgy. 2, Hinoba-an, Negros Occidental.
Ulihi nga nakit-an si Evangelista sang Abril 27 sa fiesta sang banwa kag ginreport nga missing pagkasunod nga adlaw.
Apang sang Miyerkules, nasapwan ang biktima sa bakante nga lote malapit sa motorpool sang banwa.
Sa interview sang Bombo Radyo Bacolod kay Police Major Jaynick Bermudez, hepe sang Hinoba-an Municipal Police Station, may yara sang nagkalain-lain nga anggulo nga ginalantaw nga posible motibo sa pagpatay kay Evangelista.
Suno diri, may yara sang witness apang indi pa ini maayo makuhaan sang impormasyon.
Panawagan ni Bermudez nga kun tani buligan na lamang ang kapulisan agud mahatagan sang hustisya ang biktima.
