Indi pa matumod sang Hinobaan Municipal Police Station kun paano ginharass ang maestra nga si Almarisa Aroy rason nga natalana kuntani ini nga magfile sang complaint nga sexual harassment batok sa principal nga si Warren Escosar antes ini gintiro sa sulod mismo sang campus sang Bilbao-Uybico National High School kahapon sang aga.
Madumduman nga ginpatay ni Escosar si Almarisa kaupod ang bana sini nga si Christopher Aroy antes siya nagpanginmatay paagi sa pag-um-om sang caliber .45 pistol.
Suno kay Police Major John Ganzon, hepe sang Hinobaan Municipal Police Station, naturn-over na ang mga recoveries sa Scene of the Crime Operation (SOCO) agud dal-on sa crime laboratory sang Negros Occidental Police Provincial Office agud maexamine.
Suno kay Ganzon, nagrequest ini sang mga documents nagikan sa pamilya sang mga biktima para sa reference.
Pahayag sini nga pagahulaton nila ang resulta sang examination sang crime lab para makabulig sa imbestigasyon.
Wala naman nagpasugot ang mga pamilya nga i-autopsy pa ang mga bangkay.
Ginpahayag man ni Ganzon nga wala pa sila sang makuha nga iban nga detalye sa pamilya sang biktima angot sa reklamo nga sexual harrasment, bangud sa hinali ang hitabo kag indi pa sila maistorya sang husto.
Indi man madiscuss sang hepe ang angot sa reklamo kun ano nga klase sang sexual harrasment ang nahimo sang suspek sa biktima bangud wala pa nakapadulong si Mrs. Aroy sa police station antes natabo ang insidente.
Sa karun ginaimbestigaran pa sang Hinobaan Municipal Police Station kun nagasuprer sang depression ang suspetsado samtang ginpahayag man sang hepe nga case close na ang krimen bangud nagpanginmatay ang principal.
