Positibo sa gun powder ang kamot ni Jennifer Mercader, ang drug personality nga napatay matapos ginaalegar nagbato sa otoridad sang gin-raid sang damlag lang sa Barangay Minoyan.
Madumduman nga si Jennifer Mercader nga anay punong barangay sa Borbon, Cebu ang isa man ka hired killer kag high value target may kaangtanan sa iligal nga droga.
Isa ini ka pugante nga nagpalagyo agud magpanago sa banwa sang Murcia, kag ini man ang nagapanguna nga distributor sang iligal nga droga sa probinsya sang Negros Occidental.
Si Jennifer nga isa ka fugitive ang napatay sang Lunes matapos ginaalegar magbato sa mga otoridad sang ini ang gin-aresto sa Barangay Minoya.
Suno kay Police Lt. John Paul Tabujara, hepe sang Murcia Municipal Police Station, natapos na sang Scene of The Crime Operatives (SOCO) ang pagparaffin test nga ginpangunahan ni Police Major West Edquila kag nakompirmar nga nagbato ini sa otoridad.
Ginpahayag man ni Tabujara nga nagapatigayon sila sang joint investigation sang La Carlota City Police Station bangud ang bangkay nga nasapwan sa kawayanan sa San Miguel La Carlota City ang asawa ni Jennifer ang bangkay matapos nga makilala sang pamilya sini paagi sa social media.
Ginpahayag man ni Tabujara nga ang bangkay ni Jennifer ang nakuha matapos nga nakig-angot sa ila ang anak sini nga si Julie Jean nga ginapangita man sini ang iloy.
Suno kay Tabujara, ginpahayag sang anak nanday Mercader nga sang nagpuga ang amay sini nagupod ang iya iloy padulong sa Negros Occidental.
Sa karun, padayun pa ang imbestigasyon sang kapulisan natuhoy sa insidente.
