Nagpangayo sang bulig sa Bacolod City Government ang hog growers association sa ciudad bangod sa tuman ka barato nga pamakal sang buhi nga baboy.
Nahibaluan nga yara na lamang sa P120 kada kilo ang live weight sa Bacolod City indi kaangay sa probinsya sang Negros Occidental nga yara sa P160 tubtob P170.
Ang grupo ang nagpadala sang sulat sa Committee on Agriculture nga ginapamunuan ni Councilor Jude Thadeus “Thaddy” Sayson.
Sa inteview sang Bombo Radyo Bacolod kay Sayson, gintalakay nila sa session ang letter, apang ini ang ginpakamaayo nga mapadala sa City Mayor’s Office.
Ini bangod si Bacolod City Mayor Greg Gasataya amo ang chairperson sa Local Price Monitoring Council.
Suno sa konsehal, mahimo nga ipatawag pa sang alkalde ang grupo sang hog raisers, agud madiskusyunan ang isyu kag mapatpat ang mahimo nga mangin solusyon sangsa magsalig lamang sa ginpadala nga sulat.
Nagapati si Sayson nga ang pagnubo sang presyo sang live weight ang bangod man sa epekto sang African Swine Fever, pork importation, kag supply and demand.
