Nakabakal na ang probinsya sang Negros Occidental sang kaugalingon nga machine agud nga madeterminar ang virus sa tunga sang hog cholera kag African Swine Fever kag sa karun ini ang ginapaidalum na sa trial kag calibration.
Sa interview sang Bombo Radyo kay Ric Lauron, presidente sang Alliance of Hog Raisers Association of Negros Occidental, sa masunod nga semana, posible nga magsugod na sa pag-administer ukon pagtest sa mga baboy sa probinsya agud mahimuan ini sang standard nga makabulig sa pagcontain sang virus.
Kahapon, narekord ang labing una nga kumpirmardo nga kaso sang African Swine Fever sa Negros Occidental matapos ginkumpirmar ni Victorias City Mayor Javi Benitez nga may yara sang duha ka kaso sang ASF sa ciudad.
Isa diri ang nalakip sa pito ka baboy nagikan sa Barangay Anahaw, banwa sang Hinigaran nga gindala sa Victorias Milling Corporation agud gamiton sa paghimo sang ila food products samtang ang isa naman ka kaso ang local case nga ginabug-usan sang duha ka mga baboy nagikan sa Barangay 5, Victorias City.
Suno kay Lauron, ila ginakasubo ang nasambit nga deklarasyon bangud ini ang makadugang sang palas-anon sang mga backyard hog raisers.
Suno sa iya, sa protocols ang Bureau of Animal Industry, kun madeklarar nga red zone ang isa ka lugar bangud sa ASF, wala sang movement sa hogs kag igapatuman ang 500 meter radius kag magapatigayon sang culling.
Samtang, nakaagom naman ang ARANO sang paglaom bangud yara na sa Food and Drug Administration (FDA) ang AVAC ASF live vaccine kag ila ginalauman nga makaangkon na sang Certificate of Product Registration agud magamit na diri sa pungsod.
Suno sa iya, dako gid ang mabulig sang bakuna sa mga backyard hog raisers kag ini ang ila madugay na nga ginahulat nga solusyon para sa ginaagom nga krisis sa karun sa swine industry.
Ginakalipay man sini ang nabaton nga impormasyon nga magahatag si Negros Occidental Governor Eugenio Jose “Bong” Lacson sang assistance sa mga hog raisers kun sa diin sa kada apektado nga household, ginadihon nga makahatag sang P2,000 nga assistance.
Suno sa iya, paagi diri, ila nabatyagan nga handa ang probinsya nga magbulig sa mga backyard hog raisers.
