Padayon nga ipatuman sa ciudad sang Bacolod sang Home Quarantine Pass (HQP) kadungan sa pagpaidalom sa ciudad sa General Community Quarantine sumugod Mayo 16.
Sa virtual presser nga ginapatigayon ni Mayor Evelio “Bing” Leonardia, ginpahayag sini nga liwat magaa-issue sang HQP ang city government.
Gin-athag man sini nga ang BGC mismo ang maga-imprinta sang bag-o nga HQP kag sila man ang magabutang sang numero agud mangin authentic kasunod sang mga reklamo angot sa pag-gamit sang peke nga HQP.
Suno diri, transferable ang bag-o nga HQP sa mga miyembro sang isa ka household kun sa diin masobra sa isa ka pangalan ang ibutang diri apang dapat ‘one at a time’ lang makagwa ang mga ini sa ila balay.
Samtang, sa mga empleyado naman sa pampubliko kag pribado nga kompaniya, mahimo sila nga maka-obra gamit ang ila company ID apisar nga wala sang HQP apang dapat ‘home to work’ kag ‘work to home’ lamang.
Dugang pa ni Leonardia, iga-implementar sa gihapon ang odd-even number scheme sa mga merkado kag malls kag sa iban pa nga mga pampubliko nga lugar agud nga makontrol ang mga tawo.
Padayon man nga ipatuman ang odd-even scheme sa mga plate numbers sa salakyan nagikan sa probinsya agud nga indi mag-traffic sa ciudad.
Natalana ini nga magpagwa subong nga adlaw sang executive order angot sa GCQ nga ipatuman sa Bacolod bwas.
