Nanindugan ang Home Owners Association President sang Goldcrest village sa Barangay Bata, Bacolod City nga unfair para sa iban nga mga nagabayad sang monthly dues, kun indi nila maregulate ang mga delinquent Home Owners.
Sa interview sang Bombo Radyo Bacolod kay Jesus Clavecillas, habitual na ang batasan sang complainant nga si Nathan Ray Lambatin bangod sang 2023 ini ang wala gid nakabayad bisan isa ka bes.
Sang magpungko ini sang Pebrero 2024, ang complainant ang nagbayad sang dues tubtob lamang sang Hunyo.
Paathag sini nga sa tatlo ka asod-asod nga bulan nga wala makabayad, sila ang nagapadala sang notice, apang bangod wala gid gihapon nagbayad si Lambatin, siya ang gindeklarar nila nga delinquent homeowner.
Paathag ni Clavecillas nga antes sa iya pagpungko, nagadangat sa 136 ang ginakabig delinquent homeowners apang ini ang ila napanubo sa 40 tubtob 45.
Kalakip diri ang mga foreclosed houses kag ang iban nga natumod nga wala nagid sang ikasarang sa pagbayad, nga ginhatagan nila sang exemption.
Apang sa pagtan-aw ni Clavecillas, nagapangita na lamang sang rasun si Lambatin agud indi makabayad sang monthly dues.
Paathag sini nga yara sa ila regulation nga kun wala makabayad sang monthly dues sa asosasyon, sila ang indi maka-avail sang mga services kalakip na ang sticker sang salakyan.
Panindugan sini nga sarang makalabay sa main gate ang mga deliquent home owners, apang kun maglakat ukon magsakay lamang sa depasahe nga salakyan, apang indi mapasulod ang ila personal nga salakyan bangod ini ang indi mahatagan sang sticker.
Sa baylo, sila ang nagahatag sang alternative routes.
Ginpatpat man ni Clavecillas ang madamo nga mga improvements sa subdivision lakip na ang ginpatahom kag gintinluan nga mga dalan, ang anay ginahalaban sang karbaw nga ginhimo na nga football field, pagpatahom sang club house, nakabakal sang dump truck, mga radyo kag kompleto nga CCTV, kasubong man first time nga nakakuha sang Security Guards nga gikan sa agency.
Positibo ini nga nakita sang mga home owners kun sa diin nagakadto ang ila ginabayad kag 90 porsyento sa mga ini ang nalipay sa improvements.
Panindugan sini nga indi patas para sa mga nagabayad kun ma-avail man sang mga deliquent members ang kaangay nga serbisyo sa subdivision.
Ginapakamaayo ni Clavecillas, nga kasunod sang paghugot sang regulasyon, may mga deliquent homeowners na nga nagpalapit sa iya agud ma-estoryahan ang pagsettle sang ila accounts.
