Ginpatigayon kahapon ang una nga adlaw sang distribusyon sang mga honoraria sang mga manunudlo nga nagserbe sa May 9, 2022 Elections.
Kahapon ang mga manunudlo nga nagpulaw sa paghuman sang eleksyon sang nakaligad nga Mayo 9, ang nagpila sa gwa sang Bacolod City Commission on Election (Comelec) Office agud batunon ang Honoraria nga kabaylo sang ila kakapoy.
Suno kay Geovanie Genit, nagserbe bilang Chairman sang Board of Election Inspector (BEI) sa Graciano Lopez Jaena Elementary School, ang nahatag palang kahapon amo ang honoraria sang mga Electoral Boards kag Support staff.
Ang mga Department of Education Supervisor Offical (DESO), medical kag DESO-Support Staff ang wala pa nakabatun sang ila nga Honoraria.
Ginalantaw ni Genit nga ginaseparar sa lainlain nga schedule ang pagrelease sang Honoraria agud malikawan ang pagginutok sa Comelec Office.
Nakadepende naman suno diri ang schedule sa kada eskwelahan nga ginhimo nga mga polling places.
Ginalantaw man sini nga halos tanan nga Public School Teachers ang nagserbe gani nagadangat sa linibo ka mga manunudlo ang pagahatagan sang Honoraria.
Indi naman palarehas ang balor nga mabatun sang mga nagserbe sa eleksyon kaangay sa iya bilang Chairman sang BEI nga subject sa P10,000 nga Honorarium.
Apang bangod ini ang may 20 porsyento pa nga tax gani P8,000 nalang ang mapauli sini.
Samtang ang mga Electoral Board Members naman ang subject sa P9,000 nga Honoraria.
Suno kay Genit, wala na sang kontrol ang Comelec sa pagbuhin sang tax sa ila nag Honoraria bangod ini ang santo sa layi kag mandato sang Bureau of Internal Revenue (BIR).
Paathag naman sini nga dako ang nagakabatun sang chairman bangod mas dako ang ila nga responsibilidad kun sa diin ila nasakupan ang tanan nga voting precinct sa buluthuan.
Dugang pa sini nga kun dako ang responsibilidad sang tatlo ka mga Electoral Boards, mas dako nagid ang responsibilidad sang Chairman.
Magluwas sa pagmanage sa holding areas kag precinct areas, may mga nagkaproblema man sa transmission apang indi ang nahimo man nga masolbar.
Si Genit ang nagserbe na sa halos tanan nga eleksyon humalin sang siya ang nagtudlo sa sulod sang 22 na ka tuig.
