Ginaproseso na sang Commission on Elections ang pagrelease sang honoraria sang mga miyembro sang Electoral Board nga nagserbe sa eleksyon sa Lunes.
Suno kay Negros Occidental Provincial Election Supervisor Atty. Roberto Salazar, nakabutang sa Election Service Reform Act, kinahanglan nga mabayaran ang electoral boards sa sulod sang 15 ka adlaw matapos ang eleksyon.
Ang chairman sang Electoral Board ang makabaton sang P7,000.
Ang mga miyembro naman sang Electoral Board ang makabaton sang P6,000 samtang ang DESO ang makabaton sang P5,000 kag ang support staff kag medical personnel ang makabaton sang P3,000.
May yara man sang dugang nga travel allowance nga P2,000 para sa EB members.
Ang DESO technical support staff ang makabaton sang P1,500 nga communication allowance samtang ang DESO, Electoral Board members kag support staff ang makabaton sang P500 COVID allowance.
Kun sila naman ang nagtaliwan in the line of duty, sila ang makabaton sang P500, 000.
Suno kay Salazar, may yara sang bastante nga pondo ang Comelec para sa mga honoraria.
May advisory naman ang Bureau of Internal Revenue nga indi exempted sa buwis ang honoraria kun sa diin 20 porsyento ang tax para sa DepEd personnel nga nagaincome sang P250,000 kada tuig pasaka samtang 7 porsyento naman sa private individuals.
