Dugangan sang 80 ang hospital beds sa ciudad sang Bacolod agud nga maakomodar ang iban nga mga pasyente nga natapikan sang coronavirus.
Sa interview sang Bombo Radyo kay Bacolod City Lone District Congressman Greg Gasataya, ginsapol ni Department of Health Region 6 director Marlyn Convocar ang pamunuan sang mga ospital sa ciudad kasunod sang pagkapuno sang kapasidad sang mga balay-bululngan kun sa diin indi na sila makabaton sang dugang nga COVID patients.
Suno kay Gasataya, nagcommit ang DOH Region 6 kag ang mga hospitals sa syudad sang Bacolod nga maga-increase sang bed capacity agud makaakomodar sang mga Covid-19 patients.
Ginpahayag sang Bacolod Adventist Medical Center (BAMC) nga himuon nga 27 ang ila bed capacity nagikan sa 21; ang Corazon Locsin Montelibano Regional Hospital (CLMMRH) ang mangin 97 nagikan sa 60; ang Dr. Pablo O. Torre Memorial Hospital (Riverside Medical Center) ang mangin 53 nagikan sa 22; ang South General Hospital ang mangin 17 nagikan sa lima ka mga beds; kag ang The Doctor’s Hospital ang mangin 34 na nagikan sa 33 ka bed capacity.
Madumduman nga nagtaliwan ang 33 year old nga frontliner sa ciudad sang Bacolod sang Domingo bangud wala sang ospital nga nagbaton sa iya gani wala ini nabulong sa iya trangkaso kag gincardiac arrest.
Ginpahayag man ni Gasataya nga siya ang nagapangabay lamang sa DOH kag indi man sini kontrolado ang pagpagiho sa mga opisyales sang DOH bangud indi na ini sakop sang iya trabaho.
