Ginpahayag sang political analyst nga indi dapat ipasa ni former OVP special disbursing officer Gina Acosta ang responsibilidad kay Col. Raymund Dante Lachica apisar nga may mando pa gikan kay Vice President Sara Duterte sa pagrelease sang P125 million nga confidential funds.
Madumduman nga natalupangdan ni House Private Prosecutor Atty. Amando Ligutan sa iya ginpatigayon nga direct examination sa ika-17 nga adlaw sang impeachment trial batok kay VP Sara ang sulit-sulit nga sabat ni Acosta nga ginhatag niya ni Lachica ang P125 million bangod ini ang gintalana nga security officer ni VP Sara kag mas may ihibalo sa pagpatuman sang confidential activities.
Sa interview sang Bombo Radyo kay Atty Jomax Ortiz, ginpahayag sini nga klaro nga incompetent kag wala nag-exercise sang prudence si Acosta bilang special disbursing officer.
Bangud suno diri, obligasyon sang SDO nga imonitor kag iverify kun diin idisburse ang kwarta apisar nga may yara pa sang mando gikan sa Bise Presidente.
Ini agud suno sa political analyst, masiguro nga sa tion sang liquidation, makit-an kun diin nagkadto ang kwarta.
Gani suno kay Ortiz mas mangin mabug-at ang kinahanglanon nga explanation ni Lachica sa impeachment court kun ini ang ipresantar na bilang testigo.
Sa pihak nga bahin, ginpahayag naman ni Ortiz nga posible nga natahap si former special disbursing officer sang Department of Education Edward Fajarda nga magpresentar bilang testigo bangod sa ulihi mahimo nga siya ang mapasakaan sang kaso.
Suno kay Ortiz, ini man ang rason kun ngaa nagpasa sang medical certificate si Fajarda agud mag-excuse nga indi makatambong sa trial bangud siya ang nastroke.
Bangud sini, pahayag sang abogado nga indi nagid si Fajarda makatestigo kag si Lachica nalang ang mapresentar agud mahibaluan kun ano ang status sa pagkapot sang kwarta.
Lakip na ang isa ka miyembro sang Armed Forces of the Philippines sa status sang employment ni Lachica.
