Nagapadayon pa ang ginapatigayon nga hot pursuit operation sang mga kapulisan sa at-large nga suspek sa shooting incident nga nagluntad sa Barangay Vista Alegre, Bacolod City kaina sang aga.
Ginkilala ang biktima nga si Ramelo Oliveros, 37 anyos, force multiplier samtang suspek ang ginkilala kay Dennis Galo, legal ang edad, lunsay mga residente sang Purok Cabugwason, Barangay Vista Alegre, Bacolod City.
Sa interview sang Bombo Radyo Bacolod kay Police Lt. Regino Robles, Deputy Station Commander sang Bacolod Police Station 7, ginpahibalo sila sang Bacolod Police Station 4 sa nagluntad nga shooting incident bangud sila ang una nga gintawgan sang mga pumuluyo agud magresponde.
Suno kay Robles, gilayon man sila nga nagresponde sa lugar sang insidente.
Sa ila inisyal nga imbestigasyon nagbaisay si Oliveros kag si alyas DonDon kun sa diin gulpi lang nga gintiro si Oliveros sang suspek,.
Gindala man ini sang pamilya sa ospital apang gindeklarar nga dead on arrival.
Nagapanawagan ang deputy station commander sang Bacolod Police Station 7 sa mga pumuluyo nga may impormasyon sa ginatudlo nga nga indi magkahadlok maghatag sang impormasyon agud nga madakpan kag masolbar ang nasambit nga kaso.
