Welcome para sa general manager sang Central Negros Electric Cooperative (CENECO) ang balita nga nabaton na sang House of Representatives ang House Bill 9310 nga nagahingyo sang prangkisa para sa Negros Electric Power Corporation (NEPC).
Sa interview sang Bombo Radyo Bacolod kay Atty. Arnel Lapore, ang paghatag sang prangkisa sa NEPC ang makahatag sang katumanan sa madugay na nga ginahandom sang mga pumuluyo nga maayo nga serbisyo sang electric cooperative.
Suno kay Lapore, ang nasambit nga hagna ang ginahulat nalang nga maaprubahan sang kongreso kag mapirmahan sang presidente agud mangin layi kag matigayon na nga mahatag ang franchise sang NEPC.
Ang prangkisa ang mangin lisensya kag authority sang isa ka distribution utility sa pagpadalagan sang electric service sa sulod sang franchise area sang CENECO.
Aminado man si Lapore nga ang proseso sang issuance sang prangkisa sang isa ka electric cooperative ang indi mahapos bangud madamo pa ini sang maagyan kag pila na diri ang committee on franchise kag committee on energy sa kongreso.
Samtang, ginbisitahan man sini liwat ang original charter sang CENECO kag nakita nga sang 1980 nangin effective ang prankisa gani ginalantaw nga sa 2030 ang expiry apang nagakinahanglan ini sang legal interpretation.
Nagahingyo man ang general manager sang CENECO nga mabuligan sang mga kongresista sang Negros Occidental kag ciudad sang Bacolod ang pagpatigayon sang pagpasar sang prangkisa sang NEPC agud nga makaeksperyensya man ang konsumidor sang CENECO sang maayo kag efficient nga serbisyo sang electric cooperative kaangay sang ciudad sang Iloilo.
