Gin-athag sang Vice Chairman sang Committee on Appropriations sa House of Representatives nga luyag nila kuntani madiskusyunan ang mga social services program sang Office of the Vice President sa ginapatigayon nga budget hearing.
Sa interview sang Bombo Radyo Bacolod kay House Majority Floor Leader kag Iloilo 1st District Representative Janette Garin, nangin magarot ang natabo nga budget hearing sang nakaligad nga inadlaw kun sa diin wala nagsabat sa mga pamangkot si Vice President Sara Duterte kag nagakadula man ang order bangod sa pagbinal-utanay sang mga nagahambal.
Aminado si Garin nga ini ang nagakatabo bangod madamo sang mga nagasulsol kag ang presiding officer nga si Marikina 2nd District Representative Stella Quimbo ang mainit naman kay VP Sara bangod ini man ang nagkwestyon sadto sa confidential fund sang OVP.
Pahayag sini nga prerogative sang Bise Presidente ang indi pagsabat sa pamangkot apang sa budget hearing, luyag man nila nga talakayon ang kadtuan sang pondo partikular na ang mga social services programs.
Pinaagi diri matun-an kun kinahanglan dugangan ukon buhinan ang budget depende sa expenses sang programa.
Indi kompormi si Garin sa nakaligad nga budget hearing kun sa diin may tion nga may mga personal na nga mga atake.
Nagalaom ang kongresista nga makita na ang professionalism kag diplomasiya nga nagakaangay para sa mga high ranking officials.
Ang masunod nga budget briefing ang patigayunon sa Setyembre 10.
Samtang ang desisyon kun may amyendahan, ini ang sa deliberasyon pa sang plenaryo matapos ang assessment sa Oktobre.
Diri lantawon sang mga miyembro kun may mga ahensya nga kulang sang pondo, may duplication ukon may mga programa nga sarang na lamang mahugpong.
