Nagalaom ang miyembro sang House Committee on Energy nga pamatian sang Malacañang ang hingyo sang komitiba nga mapatawag sang special session agud isuspend ang excise tax sa produktong petrolyo.
Kahapon, gin-aprubahan sang komitiba ang hagna nga ginatawag Oil Deregulation Law, “subject to form and style.”
Sa interview sang Bombo Radyo kay Rep. Carlos Isagani Zarate, ang proposed amendments sa layi ang ginalakipan sang pagpabilin sang minimum inventory reserve kun sa diin igarequire ang mga oil companies nga mag-maintain sang reserba nga produktong petrolyo.
Suno kay Zarate, kun may yara sang minimum inventory reserve ang mga oil companies, indi kadali-dali ang mga ini sa pagpasaka sang presyo sang langis sa tion nga magsaka ang presyo sini sa World Market bangud may reserba.
Ginaduso man sang House committee on energy ang pag-unbundle sa presyo sang petroluem products agud nga mahibaluan sang mga tawo kun ano ang components sang ila nga ginabayaran.
Ang ginaduso nga amendments ang kinahanglan dal-on sa plenaryo agud nga madesisyunan.
Magapatawag man sila sang special session agud nga madiskusyunan ang mga amendments kasubong ang pagsuspender sang excise tax.
Suno kay Zarate, dako ang mabuhin sang excise tax sa bili sang produktong petrolyo.
Suno diri, kinahanglan na sa karun maghimo sang tikang ang gobyerno bangud indi na maayo ang ginahimo sang mga oil companies nga pagpasaka sang presyo sang produktong petrolyo.
Indi man magkulang ang revenue sang gobyerno kun isuspend ang excise tax bangud magapabilin man ini sa mga pumuluyo kag magabalik man sa pungsod bangud ang mga tawo ang magapadayon sa pagbakal ilabi na nga indi na tuman kataas ang presyo sang mga balaklon.
