Dismayado si House Deputy Minority Leader kag ACT Partylist Representative France Castro sa ginpagwa nga desisyon sang Quezon City Prosecutor’s Office, nga nagabasura sang iya grave threats complaints batok kay former President Rodrigo Duterte.
Sa interview sang Bombo Radyo Bacolod kay Congresswoman Castro, wala pa nila nabatun ang sabat sang Quezon City Prosecutor’s Office apang ang impormasyon tuhoy sa desisyon ang nakalab-ot na sa iya kahapon.
Nakasubo man ini bangod kaangay nga indi na niya makuha ang hustisya sa gina-alegar sini pagpamahog ni former President Duterte.
Sa karun, ginatun-an pa sang iya legal team kun ano pa ang mahimo nga buhaton kag ang desisyon sa tikang ang mahimo ipagwa sa Lunes.
Aminado ang kongresista nga indi pa sila makapagwa sang desisyon sa buhaton tubtob wala pa nila makita kag ma-isa isa ang kaundan sang desisyon.
Para kay Castro, kaangay nga David versus Golliath ang iya sitwasyon bangod ini ang manunudlo lamang kag nagikan sa pigado nga pamilya samtang makagagahom naman kag ma-impluwensya ang iya gina-atubang.
Suno pa diri, ang iya nabatyag ang indi malayo sa ginabatyag sang pamilya sang mga biktima sa extra judicial killings nga tubtob sa karun wala pa makaagom sang hustisya.
Pahayag ni Castro nga sa paglantaw sini halos kaangay lamang nga abogado na ni former President Duterte ang prosecutor bangod ini ang pabor sa ginapasakaan sang reklamo.
Gindumdom sini ang natabo sa administrasyon ni former President Duterte kun sa diin naglahog ang isa ka manunudlo kag nagpost sa Twitter tuhoy sa ayuda, apang ini ang ginpasakaan sang kaso.
Apang kaangay nga kun ang anay Presidente ang nagapamahog kag itago lamang ini sa “lahog”, ini ang ginakabig lamang nga normal, nga nagapakita nga double standard ang hustisya sa Pilipinas.
Gin-athag ni Castro nga handa ini nga mag-atubang inkaso nga magfile sang counter charges ang kampo sang a anay Presidente sa panindugan nga siyha ang wala sang ginlapas nga layi, wala sang ginkawat kag wala sang ginbuhat nga malain.
Gani positibo ini nga wala sang kaso nga mapasaka sa iya, magluwas nalang kun siya ang pato-patuan sang kaso.
