Nagapati si Iloilo 1st District Representative Janette Garin, oras na para sa Pilipinas nga maglaot sa iban nga pungsod.
Sa interview sang Bombo Radyo kay House Deputy Speaker Rep. Garin, tuman na kadako ang distansya sang Pilipinas sa iban nga pungsod sa linyada sang investment opportunities.
Suno diri, sa Pilipinas wala nagasulod ang dalagko nga mga investors gikan sa mga foreign companies bangod nga indi sila makapanag-iya sang propedad, kag kun sila naman maga-collaborate sa Pilipino, kun kaisa maayo man ini apang kun kaisa may nagaluntad nga indi pag-intndihanay sa bahin sang pagpadalagan sang negosyo.
Paathag sini, sa constitutional ammendment, ilabi na sa Economic provision, nagakaigo ini para sa pagsanyog sang Pilipinas.
Dako ang pagpati ni Garin, nga oras na para sa Pilipinas ang pagbaton sa pag-amend sang constitution para sa Economic Provisions bangod nga nagasanyog ang iban nga pungsod samtang ang Pilipinas nagakabilin.
Aminado man ini nga may yara sang nagalibot nga ginapapermahan nga papel apang paathag sini nga wala sang may nagakatabo nga hatagay sang kwarta sa baylo sang perma.
Dugang pa sini, kun nalab-ot na ang 12 percent nga kinahanglan nga perma gikan sa mga registered voters sang Pilipinas, indi gilayon nga magbag-o ang constitution, bangud may yara pa sang pagadihunon nga plebisito kag pagasundan sang session, kag kun may ammendment nga matabo, ini pagahiwaton antes ang 2025 eleksyon.
