Boluntaryo nga nag-atubang si House Majority Leader Sandro Marcos sa hearing sang Independent Commission for Infrastructure (ICI) may kaangtanan sa ginaalegar iregularidad sa mga flood control projects.
Suno kay Marcos, wala ini ginpadal-an sang subpoena apang nagtambong ini agud makabulig sa imbestigasyon sang komisyon.
Ginpahayag sini nga handa siya nga sabton tanan nga pamangkot kag maghatag sang anuman nga impormasyon nga makabulig sa pag-athag sang issue.
Naghingyo ang iya kampo sang executive session, nga gilayon naman nga ginpaboran ni ICI Chairman Andres Reyes Jr.
Naangot ang pag-atubang ni Marcos sa alegasyon ni former Ako Bicol Rep. Zaldy Co nga may binilyon ini nga budget insertions sa flood control projects humalin 2023 tubtob 2025.
Hugot naman nga ginpanginwala ni Marcos ang alegasyon kag nanindugan nga wala ini sang kaangtanan sa anuman nga anomaliya.
