Ginarespeto sang miyembro sang House majority ang nangin desisyon ni former House Speaker Ferdinand Martin Romualdez nga magpanaog sa pwesto.
Sa interview sang Bombo Radyo Bacolod kay House Deputy Speaker kag Iloilo 1st District Congresswoman Janette Garin, nagakabatyagan nila nga kaangay nga ginatutdan sa karun ang House of Representative bangod sa sunod-sunod nga mga alegasyon angot sa anomalya sa flood control projects.
Pasalig sini nga nagakabatian nila ang kaakig sang mga tawo, kag ini man ang rasun nga nagpanaog si Romualdez.
Ini agud nga mahatagan sang giya kag indi ma-impluwensyahan ang imbestigasyon ilabi na nga siya ang ma-imbulbar bilang liderato sa Kamara sa 19th Congress.
Suno kay Garin, nagagwa naman nga ang mga anomalya ang sa idalom sang unprogrammed funds ukon special provisions nga wala na nagalabay sa kongreso.
Samtang ang bag-o nga liderato sa Kamara sa pagpamuno ni House Speaker Faustino “Bojie” Dy III ang mapasalig sini nga indi madistract sa issue bangod siya ang nagsulod sa 20th Congress na.
Suno kay Garin, madugay na niya nga kilala ang Dy Family, kag ang malawig nila nga serbisyo sa Isabela ang nagapakita lamang sang maayo nga performance.
Ini bangod indi man pagbotohon kag makapabilin sa pwesto ang mga politiko kun indi maayo ang ila nga pamalakad.
Pahayag ni Garin nga sila ang mangin masako na sa budget deliberation.
Sa karun wala paman nakapagwa sang intensyon si Romualdez kun luyag sini nga magkapot sang komitiba sa Kamara.
Sa pihak nga bahin, sila kaupod na si Romualdez ang nagapanawagan kay Ako Bicol Partylist Representative Zaldy Co nga magpauli na kag atubangon ang mga corruption allegations.
Apang indi man nila ini mapilit matapos nagpahayag nga magapaidalom pa sa hospitalization, kag kinahanglan man nila ini nga makumbinser nga siya ang safe sa pagpauli sa Pilipinas.
Nagapangayo man ini sang pasaylo sa publiko bangod sa mga kurapsyon sa House of Representatives nga nasuguran pa sang nakaligad nga mga administrasyon tubtob nga na-institutionalize na sa systema.
Panawagan sini sa pumuluyo nga hulaton na lamang ang resulta sang mga imbestigasyon.
