Ginpahayag ni House Deputy Majority Speaker Janette Garin nga manubo na nga sentensya ang 90 days suspension para kay Cavite 4th District Representative Kiko Barzaga, bangod para sa iya ang ethical conduct sini sa House of Representatives ang nagakaigo na sa expulsion.
Sa interview sang Bombo Radyo Bacolod sa Kongresista, apisar nga suspendido na si Barzaga sang tinalikdan, ini ang padayun gihapon sa pagpagwa sang mga statement nga kabutigan.
Para kay Garin, may ara sang problema sa personalidad si Barzaga.
Ini bangod kun atubang sini ang mga kongresista, daw makitluoy pa ini kun makasala, apang sa pagwa sa media lain naman ang ginasugid.
Suno diri, ang ginahimo ni Barzaga ang nagaguba nagid sa imahen sang Pilipinas bangod nagagwa sa mga foreign investors kag tourist nga tuman nagid kagamo sang Pilipinas.
Pahayag ni Garin nga sang konsehal pa lamang sa Dasmariñas City si Kiko, siya ang indi na makontrolar bisan sang iya iloy nga si Mayor Jenny Barzaga.
Ang iloy man sini kuntani ang magapapili bilang kongresista, apang nagapamahog si Kiko kun indi siya pahanugutan nga magpadalagan.
Suno kay Garin, naluoy ini kay Congressman Barzaga bangod mahimo nga ang stress bilang public official ang nagpalala pagid sang iya problema sa personalidad.
Pahayag sini nga kaangay nga nagasaka sa utok ni Barzaga ang gahom bilang kongresista.
Suno diri, gin-offer man nila kay Barzaga nga ini ang matudluan sa deliberasyon apang wala ini sa interes sang kongresista, sa panindugan nga siya ang indi makita sa media.
Pahayag ni Garin nga kaangay nga nagahampang lamang si Barzaga, kag mas luyag lang sini nga magpapresscon agud mabutang sa balita bangod sa handom sini nga mangin Presidente kun yara na sa husto nga edad.
Dugang pa sini nga sa break sang session, ang iban ang nagatuon kag ang iban ang nagapreparar para sa pagpartisipar, apang si Barzaga ang nagalibot, nagavideo kag nagapangagaw sang gamit sang iban sa depensa nga ini ang kinawatan man.
