Ginpaidalom sa “heightened alert” ang security personnel sa House of Representatives sa Batasan, Quezon City matapos makabatun sang “bomb threat”.
Ini ang ginkumpirmar mismo kaina sang aga, ni House Secretary General Reginald Velasco kasunod sang flag-raising ceremony.
Paathag sini nga indi niya mabuyagyag kun sin-o ang mga nakabatun sang pagpamahog, apang may pila ka mga kongresista nga nakabatun sini.
Nakapahayag sa pamahog nga mahimo bombahan ang House of Representatives.
Suno kay Velasco, ini ang ila ginaseryoso, gani nagpatigayon na sang special precaution.
Paathag ni Velasco nga wala ini nakapagwa sang memorandum apang mismo ang securities na ang nagpahugot sa pagbantay.
Dugang sini nga luyag lamang nila nga maproteksyunan ang mga miyembro sang Kamara, kasubong man ang mga staff kag empleyado sang House gikan sa ano man nga untoward incidents.
Bangod sini, si Velasco ang nakighinun-anon na sa sergeants at arms kag nagmando sa pagpatuman sang mas hugot nga security sa tanan nga mga nagasulod sa building, partikular na sa mga indi miyembro sang Kamara kag indi empleyado sang institusyon.
