Ginpahayag sang Human Rights Lawyer nga importante nga makapakita ang prosecution team sang “unified theory” sa nagahilapit nga impeachment trial ni Vice President Sara Duterte.
Sa interview sang Bombo Radyo kay Atty. Cesar Beloria, kinahanglan mag-uyon ang mga prosecutor sa ila argumento kag mapamatud-an kun ano nga mga aksyon ang naga-qualify bilang impeachable offense base sa Konstitusyon. Suno diri, sa pinakamabudlay nga bahin sang kaso amo ang pagpresentar kag pag-authenticate sang mga dokumento kaangay sang bank records.
Dugang pa sini, posible nga may madamo sang objections ang depensa, lakip na ang mga isyu sa hearsay, chain of custody, kag confidentiality sang ebidensya. Posible man nga ma-challenge ang mga ebidensya kun wala ini na-secure ukon na-authenticate.
Suno pa kay Beloria, indi man malikawan nga may yara sang bias sa bahin sang impeactment court judges bisan pa sa ginpahyag nga magabase sa ebidensya ang ila pagdesisyon.
Dugang pa sini, posible man nga mag-resign si Duterte antes matapos ang trial.
Apang, paathag ni Beloria nga kun may makita nga paglapas sa espiritu sang Konstitusyon, posible nga ipadayon sa gihapon ang kaso. Dugang pa niya, bisan ma-convict ukon indi sa impeachment, mahimo gihapon nga mapasakaan sang kaso ang isa ka opisyal.
