Naghingyo ang House prosecutors sa Senate Impeachment Court sang apat ka dugang nga pre-trial measures para sa organisado, maathag, kag episyente nga hearing sa impeachment trial ni Vice President Sara Duterte.
Sa gin-file nga manifestation subong nga adlaw, Miyerkules, ginduso sang prosekusyon ang paggamit sang Filipino kag Ingles sa mga hearing, timprano nga pagpresenta sang mga testigo, pagpahanugot sa public kag private prosecutors nga mag-usisa sa mga testigo, kag pagbukas sang sealed boxes of records halin sa Bureau of Internal Revenue (BIR) nga yara sa kustodiya sang korte.
Suno sa prosekusyon, ang mga tikang ang makabulig sa pagpadasig sang trial, malikawan ang mga procedural dispute, kag mamentinar ang focus sa pagpresentar sang ebidensya kag testimonya.
Natalana nga mag-umpisa ang pormal nga trial sa Hulyo 6 samtang nagapadayon ang pre-trial proceedings.
