Nagalaom ang konsehal kag abogado sa ciudad sang Bacolod nga ma-apresyar man sang publiko ang ginahimo nga House Quad Committee Hearing.
Sa interview sang Bombo Radyo Bacolod kay Bacolod City Councilor Atty Renecito Novero, obligasyon sang mga kongresista nga magpatigayon sang imbestigasyon sa mga issue nga nagtublag sa publiko, nagpatay sang madamo kag pamilya nga nagapangayo sang hustisya.
Ini ang magaserbe nga giya sa paghimo sang layi.
Samtang oblugasyon man sang mga resource person bilang citizen sa Republic of the Philippines nga ihatag ang ginapangayo nga impormasyon sa imbestigasyon.
Suno kay Novero, ginahimo sang House of Representatives ang tanan gani dapat ini ang ma-apresyar.
Aminado ini nga may lapses man sa mga Kongresista nga kun kaisa ginaka-ugtan, gina-ustasan kag makaladlawan, apang dapat nga mas mangibabaw ang pag-apresyar sa ila nga effort agud matuman ang obligasyon sa gobyerno.
Ginadayaw man ni Novero ang Kongreso bangod suno diri, wala nakabinastos si former President Rodrigo Duterte kag na-obserbar ang rules of decorum kag order.
Isa sa nakabig sini nga dalayawon ang kaisog ni Abang Lingkod Partylist Representative Joseph Stephen “Caraps” Paduano, chairperson sang Committee on Public Accounts, nga nagarepresentar man sa Bacolod City kag Negros Occidental.
Na-apresyar man ni Novero ang voluntary appearance ni Duterte agud makabulig sa pagklaro sang mga issue.
Nagapati man ini nga bilang abogado kag former prosecutor, nakahibalo na si Duterte nga tanan nga statement nga ginbuy-an sini sa House QuadCom hearing ang recorded kag magamit pabor man ukon batok sa iya.
