Ginhingyo ni House Speaker Martin Romualdez sa kontrobersiyal nga si Negros Oriental Representative Arnolfo “Arnie” Teves nga ikonsiderar ang plano sini nga indi anay magpauli sa Pilipinas.
Ginpasalig man sang lider nga indi ini magpasilabot sa ginapatigayon nga imbestigasyon sang Ethics committee may kaangtanan sa indi pagpauli ni Teves apisar nga naglapse na ang iya nga travel authority.
Kahapon, ginpahayag ni Romualdez nga sang Miyerkules nagpatigayon sila sang private meeting sang abogado ni Teves kun sa diin ginhingyo sa iya nga pahanugutan ini nga maka-avail sang leave of absense sang duha ka bulan bangod sa dako nga pagpanghangkat sa iya nga kabuhi kag sa iya nga pamilya.
Suno diri, ginpanindugan niya sa meeting nga dapat na nga magpauli si Congressman Teves kag magreport sa trabaho.
Dugang pa nga panawagan sang lider sang Kamara, nga dapat ikonsiderar ni Teves ang iya nga desiston nga indi magpauli, bangod indi nagakaigo para sa isa ka katapo sang House of Representative nga magpalagyo sa luwas sang pungsod imbes nga mag-avail sang tanan nga legal remedies nga available.
Nahibaluan nga ginpasakaan sang kaso si Teves may kaangtanan sa mga insidente sang pinatyanay sa Negros Oriental sadtong 2019.
Ginreklamo man ini sang kapulisan may kaangtanan sa mga nakumpiskar nga iligal nga armas-luthang sa iya nga balay nga ginraid sang mga otoridad nakaligad nga semana.
Ginpalab-ot man ni Romualdez kay Topacio ang desisyon sang House Committee on Ethics and Privileges nga imbestigaran si Teves bangod sa padayun sini nga pag-absent sa session sang Kamara apisar nga nagtakop na sang Marso 9 ang travel authority nga gin-issue sa iya sang ini ang magpadulong sa America.
Pasalig ni Romualdez nga indi niya balabagan ang nasambit nga imbestigasyon.
Paathag sini nga siya ang magadesisyon na lamang sa tion nga matapos na sang komitiba ang ila nga imbestigasyon kag makasumiter sang rekomendasyon sa House leadership, kadungan sa pagpasalig sini nga himuon niya ang tanan agud maseguro ang kahiwayan ni Teves sa pagpauli sa pungsod.
