Ginpahayag ni House Speaker Martin Romualdez nga wala gihapon nakacontact sa liderato sang House of Representative si Negros Oriental Representative Arnolfo “Arnie” Teves apisar nga nag-expire na ang iya nga travel authority sang nakaligad nga Marso 9.
Dugang pa sini nga humalin sang nag-apelar ini sa Kongresista nga magbalik sa Pilipinas sang Marso 10, wala pa ini sang may nabatun nga reply ukon bisan ano nga communication gikan kay Congressman Teves.
Ginalauman sang House Speaker nga magasunod si Teves sa iya nga apelasyon kag magreport na sa trabaho, bangod indi na otorisado sang Kamara ang pagtinir sini sa luwas sang pungsod.
Madumduman nga si Teves, nga nahibaluan nga nagpadulong sa Estados Unidos, ang ginatudlo nga konektado sa pila ka mga kaso sang pagpamatay sadtong 2019 santo sa kaso nga ginfile sang Criminal Investigation and Detection Group (CIDG).
Nakaligad nga semana, ginraid sang mga kapulisan ang pila sa mga balay ni Teves sa Negros Oriental agud magpangita sang mga iligal nga armas-luthang.
Una naman nga nagpahayag si Atty. Ferdinand Topacio, legal counsel sang pamilya Teves nga nakahanda ang Kongresista sa pag-atubang sa akusasyon batok sa iya apang ini ang nagakabalaka lamang sa iya nga kahilwayan.
Ginpasalig naman ni Romualdez nga wala sang dapat nga ikahadlok si Teves bangod nakahanda man sa paghatag sang security ang mga law enforcers, sa tion nga ini ang magsungka.
Paathag sang House Speaker nga ini ang ginpasalig mismo sang mga opisyal sang Philippine National Police (PNP) kun magahingyo ang kongresista.
Dugang pa ni Romualdez nga indi makahatag sang proteksyon ang mga law enforcers sa gwa sang Pilipinas.
Ginpasalig man ni Justice Secretary Jesus Crispin Remulla kay Teves nga ini ang may seguridad sa iya nga pagbalik sa pungsod.
Madumduman nga nakaligad nga semana, ginpangalanan sang mga suspetsado nga si certain “Cong Teves” amo ang yara sa likod sang pag-assassinate kay Negros Oriental Governor Roel Degamo.
Sa pihak nga bahin, una naman nga nagdepensa si Congressman Teves nga siya kag ang iya nga utod ang wala sang kaangtanan sa pagpatay sa gobernador kag walo ka iban pa.
