Nagpanawagan ang Highway Patrol Group- Negros Island Region (HPG- NIR) sa mga biktima sang modus nga benta-bawi, sangla-bawi, kag assume-balance nga makig-angot lamang sa ila sa pagpasaka sang kaso.
Sa interview sang Bombo Radyo kay PLt Col Ma. Delma Pedrezuela, officer in charge sang Regional Highway Patrol Unit- Negros Island Region, may pito na nga nagpadulong sa ila para magreport apang ila pa ini ginaverfiy kun bala legit ukon sila ang miyembro man sang grupo nga nagapang-into.
Suno diri, ginatawag nila nga technical carnapping ang ginahimo nga modus.
Ang modus nga assume- balance amo nga kun may yara sang unit nga indi na mapadayon bayaran, ini ginapa-assume apang wala man ginabayaran sang nag-assume kag ang ginasukot amo sa gihapon ang una nga nagapanag-iya.
Ang benta-bawi naman, amo nga kun nabaligya na ang unit, matapos ang pila ka bulan ireport ang salakyan kag bawion sang una nga nagapanag-iya kag ang papeles nga ginhatag sa nagbakal lunsay mga peke.
Ang renta-bawi naman amo nga kun nagparenta sang salakyan, mahal ang sukot kag kun indi mabayaran sang tingob, ini ang bawion kag liwat nga iparenta sa iban.
Pahayag ni Pedrezuela, maghalong sa mga nagatanyag sang manubo nga presyo sang salakyan kag mas maayo nga ireport ini agud masiguro kun legit ukon indi.
