Patay ang isa ka lalaki matapos nga matirohan sang bata sang Punong Barangay sa Barangay Isio, Banwa sang Cauayan samtang nagaselebrar sang bag-ong tuig.
Sa interview sang Bombo Radyo Bacolod kay Police Lt. Colonel Norberto Barniso, hepe sang Cauayan Municipal Police Station, ginkilala ang biktima nga si Erwin Flores, 30-anyos samtang ang suspetsado ang ginkilala naman nga si Keyer Agustin, 33-anyos, lunsay residente sang nasambit nga Barangay.
Suno kay Barniso, hinali nga ginhaboyan sang suspect sang palupok ang hinablos sang biktima.
Bangud sini, nagluntad ang mainit nga komprontahanay kun sa diin nagkuha sang armas-luthang ang suspect nga nagresulta sa pagtiro kay Flores, nga naka-agom sang pilas sa nagkalain-lain nga parte sang lawas.
Ang biktima ang may dala man sang sundang kag gina-alegar nga nakabalos pa ini labo sa suspetsado.
Lunsay ginpangdala sa Cauayan District Hospital ang biktima kag suspetsado apang bangud sa mga pilas nga naangkon ni Flores, ini ang ginbawian sang kabuhi.
Magapasaka naman sang kaso ang pamilya sang biktima batok sa suspect.
