Napatay sang isa ka Barangay Kagawad ang hubog nga nagapangharass sa malabayan sini sa dalan nga nagabitbit sang espading kag tabas sa syudad sang Himamaylan, Negros Occidental.
Ang suspetsado ang ginkilala kay Esmeraldo Indico Jr, 35 anyos, may asawa kag isa ka Barangay Kagawad samtang ang biktima ang ginkilala kay Danilo Latingga, 43 anyos isa ka laborer.
Ang insidente ang nagluntad sa Sitio Lati, Barangay Mahalang sa nasambit nga syudad kun sa diin man nagapuyo ang duha.
Santo sa imbistigasyon sang Himamaylan City Police Station, gikan sa trabaho ang biktima nga si Latingga samtang ini ang hubog naman nga nagapanglakaton bitbit ang cane cutter ukon espading sa natuo nga kamot samtang cane bolo ukon tabas naman sa nawala nga kamot.
Ang biktima ang gina-alegar nagmaoy sa lugar kag ginaharras sini ang tanan nga iya malabyan.
Kalakip sa gin-atake sini amo si Barangay Kagawad Indico nga gilayon naman naghunos sang wala matumod nga kalibre sang armas kag ginluthang ang biktima nga gintunaan sang kamatayon sini.
Santo sa mga nakakita sang insidente, masami na nga nagamaoy sa lugar si Latingga samtang ang Barangay Kagawad amo man ang masami nga nagakomprontar sa iya.
Gilayon naman nga nagpalagyo ang Barangay Kagawad kasunod sang insidente.
Nakuha sa crime scene ang espading, tabas kag isa ka empty cartridge sang 12 gauge shot gun.
Igapaidalum naman sa post mortem examination ang bangkay sang biktima.
Sa karun, nagapadayun pa ang hot pursuit operation sang mga kapulisan sa nagpalagyo nga Barangay Kagawad.
