Ginpahayag sang human rights lawyer nga kinahanglan nga pamatud-an ang alegasyon sang anomalya sa Bicameral committee report sang 2025 General Appropriations Act sa pagfile sang kaso batok kay House Speaker Martin Romualdez kag duha ka iban pa.
Ini kasunod sa pahayag nanday senatorial aspirants Atty Jimmy Bondoc kag Atty Raul Lambino, kasubong man ni Atty Ferdinand Topacio, kag sang non-government organization Citizens Crime Watch, nga sila ang magapasaka sang kaso batok kay Romualdez, House Majority Leader Manuel Jose Dalipe kag former House appropriations committee chairperson and Ako Bicol Party-list Representative Zaldy Co.
Sa interview sang Bombo Radyo Bacolod kay Atty. Ceasar Beloria, kun mapamatud-an nga may basihan sa alegasyon, makabig illegal ang pagfill-in sang mga balor sa naaprubahan ng bicameral report.
Paathag ni Beloria nga sa layi, nakapagkit nga ang legislative body lamang ang sarang makabutang sang amount sa mga items sang General Appropriations Act.
Apang ginapahayag nga may technical working group nga gina-alegar ginhatagan sang authority nga magfill-in sang amount antes ipasa sa Office of the President.
Panindugan sang human rights lawyer nga kun mapamatud-an, sarang mapasaka ang graft kag administrative cases.
Suno kay Beloria, nga kun kulang pa sang amount ang mga items, ini ang dapat nga ibalik sa plenaryo sang Kamara ukon amyendahan kun may clerical error.
Apang panindugan sini nga kun may maayo nga ground para sa complaint, ini ang dapat pamatud-an.
Suno diri, may conspiracy theory kun sa diin si Romualdez amo ang nag-authorize sa technical working group sa pagfill-in sang amount sa pila ka blangko nga items, nga makabig usurpation sang legislative function.
Nagapati si Beloria nga ang complaint ang mahimo maglawig pa sang tinuig antes maresolbar bangod madamo kag malawig pa ang proseso.
