Ginpahayag sang human rights lawyer sa ciudad sang Bacolod nga mahimo magpatuman sang Philippine National Police sang reasonable force para matigayon nga maaresto ang subject sa warrant of arrest.
Madumduman nga ginsulod sang masobra dos mil ka mga kapulisan ang Kingdom of Jesus Christ (KOJC) compound para magserbe sang warrant of arrest kay Pastor Apollo Quiboloy.
Sa interview sang Bombo Radyo Bacolod kay Atty. Caesar Beloria, dapat nga lantawon ang procedure sa pag-execute sang warrant kasubong man nga lantawon ang aktwal nga sitwasyon.
Suno diri, kapin sa 30 ektarya ang kalaparon sang compound kag dugang pa nga nagapamalabag ang mga miyembro sang KOJC, amo nga nagakadapat lang nga dako nga numero sang pulis ang ginpadala.
Suno sa abogado, ang pamangkot diri kun bala may yara sang unreasonable nga pwersa nga gingamit bangod ini ang mahimo nga makwestyon kag makabig nga wala ginsunod ang local order sang korte.
Dugang pa sini, dapat nga may maipakita nga ebidensya ang naga-alegar nga may sala ang PNP sa pagserbe sang warrant of arrest.
Importante man suno kay Beloria nga yara didto sa compound si Quiboloy bangod kun wala, posible nga kwestyonon ang basehan sang warrant of arrest.
Paathag ni Beloria, dapat reasonable nga pwersa lamang ang gamiton sang kapulisan kag indi na magpasobra pa agud nga wala sang may mabayolar nga reputasyon kag kinamatarong sang tawo.
Sa pihak nga bahin, para kay Atty Caesar Beloria, indi magamit nga justification ang pagpa-effect sang aresto kay Quiboloy para ipaidalum sa state of emergency ang Mindanao.
Suno diri, wala diri sang basehan ang gobyerno para ipatuman ini para lamang kay Quiboloy.
