Ginalantaw sang Human Rights Lawyer nga madamo pagid sang mga pangalan nga ma-involve inkaso magkooperar na si dismissed Bamban, Tarlac Mayor Alice Guo sa imbestigasyon.
Sa interview sang Bombo Radyo Bacolod kay Atty Ceasar Beloria, nangin tuman na kalapad ang issue.
Ilabi na nga natumod na nga kunektado, partikular na sa una nga pagka-aresto kay Shiela Guo kag Cassandra Li Ong, nga involved naman sa illegal Philippine Offshore Gaming Operators (POGOs).
Kag kasunod sa pagkatukib sang identity ni Guo, nahibaluan man nga may bulk nga numero sang Chinese Nationals nga ginhatagan sang Filipino identity.
Suno kay Beloria, isa sa mga hibaluon gid sang mga otoridad, Kongreso kag Senado kun sin-o ang mga opisyal sang gobyerno nga nagbulig kay Guo nga makapanago kag makapalagyo.
Kalakip na diri ang mga personnel sang Bureau of Immigration.
Nagapati si Beloria nga sa pagpadayun sang imbestigasyon, mas madamo pa nga mga pangalan ang magwa.
Sarang man nga magamit sang kapulisan nga pasalig ang seguridad sini, agud masugid ni Guo kun diin gikan ang nabatun nga death threat kag kun sa ano nga rasun.
Magluwas diri, sa umpisa palang kwestyonable man kun ngaa sa Bamban, Tarlac ginpili nga magbutang sang Alice Guo agud magpungko bilang alkalde.
Kun matuod nga Chinese National si Guo kag nagapakuno-kuno lamang nga may lahi nga Pilipino, ginalantaw ni Beloria nga may mas mataas nga tawo sa likod sini.
Ginalantaw man sini ang posibilidad nga mga Pilipino nga yara sa pwesto man mismo ang isa sa mga involved bangod ini ang indi makapanggamot sa banwa nga wala sang bulig sang lokal.
Suno diri, agud mapamatud-an nga indi siya ang major player dapat sini nga isugid kun sin-o ang mga personalidad nga nagakapot sa iya.
