Nagapati ang Human Rights Lawyer nga indi na kinahanglan pa nga mag-atubang liwat ni former President Rodrigo Duterte sa senate hearing bangod nga indi naman bag-o ang statement sini nga pagpabugal sa iya konsepto sa war on drugs.
Sa interview sang Bombo Radyo Bacolod kay Atty. Cesar Beloria, kun may yara sang direktiba sa mga kapulisan sa war on drugs posible naman nga wala nakahibalo si Duterte sang specific nga mga police operations apang indi ini sa gihapon makapalagyo bangod siya ang ginatudlo nga pinakamataas nga lider sang war on drugs.
Suno kay Beloria, apisar nga wala na ini nakibot sa mga statements sang anay presidente, apang makapalanindog balahibo nga kaangay ordinaryo ang pagpatay sang isa ka tawo.
Dako ang pagpati sini nga wala sang kinamatarong ang tawo nga magkuha sang kabuhi sang tawo kag kun may sala gid man ini, dapat nga kasohan agud nga matudluan sang insakto kag indi nga patyon ang tawo.
